5大必睇新日劇 木村惡鬥草彅剛最吸睛

發佈時間: 2017/01/20

5大必睇新日劇 木村惡鬥草彅剛最吸睛

雖則話,近年日劇聲勢比起韓劇唔止輸足九條街,但其實都有一班死忠日劇迷,對偶像不離不棄。就趁今季日劇開播得七七八八,盤點一下五套必睇新劇,不用獨沽一味睇小鮮肉騷肌。

江湖傳聞,「萬人迷」木村拓哉因SMAP解散事件中做「二五仔」,令他犯眾憎到沒有女星肯與他做拍檔,幾經辛苦,《A LIFE~深愛的人~》請到《冰之驕子》木村舊拍檔竹內結子加盟,反而令外間更關注木村新劇的成績。惟上周日首播錄得14.2%收視,是他個人劇集最差開播收視,坊間不少人指木村已人氣不再。但公道點講,在日劇近年收視已不大如前下,該劇有此成績,已經叫劇迷收貨。再加上劇本雖以醫療劇作題材,但實際是講「挽救愛人性命」的故事,預料劇迷還是邊鬧邊睇,最終收視差極有限。

復仇作有市場

無獨有偶,木村的前隊友草彅剛,今季同時又有新劇《謊言戰爭》開播,亦是日劇《錢的戰爭》復仇系列的姊妹作,故事講述草彅剛為報復,成為天才詐欺師,並與殺父母仇人一決高下的懸疑作品。該劇首播錄得11.8%,僅輸木村新劇少許,而這類復仇懸疑劇,在日本有不少捧場客,再有草彅剛「逆襲之作」加持,觀眾好難錯過睇好戲。

松隆子歌聲探討人性

90年代日劇天后松隆子,時隔五年後再演日劇,話題性已經滿分。劇中,她飾演一名30代的音樂人,透過音樂探討人生。日前官方更公開了由椎名林檎作曲、四位主角主唱的劇集主題曲MV,松隆子大開金口唱歌,對上一次是三年前幫日文版《冰雪奇緣》唱《Let it go》,沒有藉口不看。

深田恭子做怪獸家長

去年深田恭子憑一套《請與廢柴的我談戀愛》再次彈起,今次一改她過往演過無數次的靚女角色,擔任「怪獸家長」與同為中學畢業學歷的丈夫,如何力谷女兒考入名校,夠晒貼地。

吉高由里子瘋狂之作

為日本女星吉高由里子度身訂造的漫畫改篇作,講述吉高與榮倉奈奈及大島優子三個30歲、愛幻想的單身女子愛情喜劇,吉高出名言行神化,新劇肯定爆笑連場。

撰文︰張悅

編輯︰林梓添

設計︰梁政敏

欄名: 娛樂專題