內地券商玩火

從不諱言支持體罰，尤其是對着小一已被班主任歸類為「任我行」、總愛伺機踩界、挑戰大人底綫的「臭B」，小學雞每以為一旦可越過監管行為底綫，規矩就可由他去定。有人認為應該循循善誘、多講道理，惟當講道理解釋，你以為佢明，偏偏佢就係唔明或者博大霧扮無知；滿以為不知者不罪，試圖或企圖一再測試監管底綫，就係典型五行欠打。

國策要股票市場健康發展，廣大人民怎會不知曉，處於政策風口的一眾券商，更沒扮懵理由，只是一方眼見資金要出路，卻無樓可炒，難得政策扶持股市，另一方打開門做生意，斷估亦無理由趕客。當市況太熾熱、中央要在泡沫成形前降溫，高調處罰幾家龍頭券商，用心良苦，惟市場參與者刻意再挑機，有券商指罰停兩融影響只區區一千萬元，即係唔罰唔知面皮厚；回想幾年前家中反叛臭B被打屁股，曾經同樣懶醒，爆了句：「唔痛嘅！」不講由自可，一講佢娘親把幾火，後果係「打到屁股開花」。

上有政策、下有對策，一放就亂，是中國特色，為規避孖展政策規管，券商竟大搞網上「微融資」，只要有股票抵押，資金不限用途，似較被罰前去得更盡，凡事去得太盡，緣份亦會早盡，何謂以為精甩邊，其實攞嚟賤，牙斬斬的下一句是甚麼？你懂的。