聲演《藍精靈》美芝 蔡卓妍友愛大冒險

發佈時間: 2017/04/13

聲演《藍精靈》美芝 蔡卓妍友愛大冒險

蔡卓妍(阿Sa)早前為動畫片《藍精靈:迷失的村莊》配音,又忙於舉行Twins巡迴演唱會,她自爆近日接受針灸及吃中藥養聲,醫生更警告她不要過度用聲。不過,阿Sa坦言今次配音過足癮,覺得跟美芝性格好相似。

藍精靈、十分勁,呢班友仔其實擁有很多粉絲,當中的美芝更是萬千寵愛在一身,阿Sa說到眉飛色舞,自爆配音時趣事。「我好鍾意配音,細個喺屋企好無聊,特登調細聲個電視,再自行創作對白。以前多數配男仔或者中性角色,但今次要配美芝,幾好玩。記得有一幕要美芝扮牢騷王,我要好快轉換把聲,一個最鍾意彩虹,一個最憎就係彩虹,好似人格分裂咁。」

阿Sa笑言十多年前為《小飛俠》配音,做到好夜,結果要同阿嬌(鍾欣潼)在配音室外輪流瞓梳化。「我同阿嬌都經歷過好多嘢,無論在工作上或者人生上,大家都睇住對方經歷好多難關。」

今集《藍精靈》,美芝同樣經歷重重難關,她與論盡仔、智多星等展開一段奇幻歷險,但阿Sa就不贊成離家出走。「我完全唔會做啲咁笨嘅事,以前見到同學離家出走,覺得無嘢食好慘,為乜要走?最多都係畀人鬧下,其實我由細到大都畀人鬧慣,鬧下啫,又唔痛嘅。」

沙灘過夜數星星

年輕人固然不應該離家出走,但趁後生去旅行增值自己卻無妨。「我成日一個人去旅行,有一次去沖繩睇演唱會,兩日一夜,第二日中午機返,聽人講沖繩海灘啲沙係星砂,我打算唔搵酒店直接瞓沙灘,地下有星星,天上又有星星,嘩!好浪漫。點知我被阿嬌鬧到飛起,咁啱林二汶都去睇演唱會,阿嬌即刻打電話叫二汶一定要逼我住酒店,但我覺得瞓沙灘浪漫啲。」

此外,阿Sa早前跟好友容祖兒一齊參加內地真人騷《奔跑吧兄弟》,又是另一次大冒險。「真係好好玩,我同祖兒兩個由朝笑到晚,每朝六時起身化粧,八時就去玩,玩到手腳損晒。祖兒明明贏咗都唔知,隊友被佢激到嘔血。」「跑男」台柱王祖藍有否錫住你?「佢淨係照顧志玲姐姐(林志玲),完全無理過我哋,佢鍾意高人吖嘛。」阿Sa工作認真,其實亦愛玩愛笑,難怪她在圈中人緣甚廣。

阿Sa樂做臨時保母

蔡卓妍與Shine兩子徐天佑、黃又南前晚出席《藍精靈:迷失的村莊》首映禮,阿Sa早前趁假期帶了朋友的兩個女兒去睇優先場,又去迪士尼樂園遊玩,她直言化身保母絕不輕鬆,但與小朋友相處非常開心。阿Sa表示:「都係第一次帶小朋友睇戲,佢哋不停食嘢和發問,好搞笑,原來真係好忙,湊兩個女仔就ok,男仔就搞唔掂,我諗Shine細個都幾難湊。」至於天佑則計劃同老婆組織小家庭,最希望生夠一仔一女。

撰文:禮祖

協力:陳麗娜

攝影:林良明

編輯:陳禮恒

設計:K

欄名: 人物專題