黛安
黛安

名醫陳忠良重養生 入校教低頭族護脊

發佈時間: 2017/04/21

名醫陳忠良重養生 入校教低頭族護脊

早排放假去咗宜蘭旅行,點知顧住玩,唔小心整親條腰,返到香港立即搵名醫陳忠良求救。黛安身邊不少朋友都是陳醫生的客人,他行醫40多年,治療過無數病人,亦曾替影帝梁朝偉、「秋官」鄭少秋等根治病痛,所以有「東方魔術手」的稱號。

每1小時 鬆2分鐘

經驗老到的陳醫生,當日一摸我條腰,即刻知道問題緣自黛安的舊患。的確,當年黛安在外國讀書,滑雪時曾經整傷條腰,由於處理不善,如今每當我玩得太癲或夜瞓時,條腰就會見痛;有時甚至打個乞嚏,就會搞到腰間椎盤移位,手尾好長。

期間陳醫生一路幫我治療,一邊傾起行醫理念,他說今時今日單講「醫」並唔足夠,其實大家應更着重養生及健康。黛安笑他:「無人睇醫生你咪無生意?」陳醫生當然唔介意,皆因他認為相對有病先至去睇醫生,大家更應在日常生活中着重保健,避免自己患病,咁先至係上策。

他講起近年愈來愈多人因為長時間使用手機和電腦,成為「低頭族」,以致頸脊問題叢生,令他很痛心。近年成立一個世界脊柱健康聯盟,香港總會亦於上月成立,第一個活動是籌備「兩岸四地關注青少年脊柱健康」活動,稍後五至六月還會入學校推廣,教中學生點去保護自己脊柱健康。黛安問他有何護頸良方?原來方法好簡單,就係每隔一小時,郁一郁肩頸位置,舒展兩分鐘,咁就OK!大家不妨跟住做。

撰文: 黛安 消息特靈八卦公關
欄名: 八卦名利場