荔枝角戶外影院 免費登記睇法國戲

即將踏入五月，黛安覺得整個城市都開始瀰漫住一股藝術氣息，事關「法國五月」的活動正接踵而來。好似下星期三（26/4）起，沙田文化博物館將展出巴黎羅浮宮的珍品；昨日黛安又收到風，荔枝角的D2 Place亦將與法國五月合作，將天台變身成為戶外電影院，於5月6日起一連5個星期六晚上，播放5齣老少咸宜的精選法國人氣電影，包括《我在伊朗長大》、《歌聲伴我心》等等，而且仲係免費入場㗎！如果你有興趣，記住事先在網上登記（http://bit.ly/2pfzJCW），每場名額200個，每人每場只限預留2個名額，大會之後會向成功登記的人發出確認電郵。

現場唔單止會提供免費爆谷畀大家食住睇戲，仲有多個特色美食及本地小食攤檔。黛安建議你早啲入場，事關每場首50名入場的參加者，將可獲贈免費啤酒或雪糕券㗎！