城大EMBA廿周年 晚宴星光熠熠

城大行政人員工商管理碩士課程（EMBA）今年20歲喇！早前黛安出席佢哋同城大EMBA同學會搞嘅「EMBA昇華二十慈善晚會暨EMBAA年度晚宴」，當晚陣容鼎盛，超過200幾位EMBA學生、校友、商界精英翹楚同社會名流，一齊見證同慶祝EMBA咁多年努力嘅成果呀，非常熱鬧！

當晚亮點之一就係請到各知名商界領袖、金融界巨子做主題演講嘉賓，包括香港交易所前行政總裁周文耀、城大前MBA課程主任曾淵滄、城大EMBA校友張德熙等，就「20淵德永耀–與你昇華的二十年」分享前瞻同未來願景，黛安獲益良多！同場仲有慈善拍賣，多位嘉賓捐出珍品，包括城大商學院院長嚴厚民捐出風景藝術照、著名剪紙藝術家杜寶春捐出「12生肖齊添福」剪紙藝術畫等，為EMBAA慈善基金籌得70幾萬善款！