$759無限次入迪士尼 學生哥邂逅超級英雄

講起優惠着數，無乜嘢實際得過任食任玩。尤其是學生哥仲讀緊書，真係慳得一蚊得一蚊，每分每毫都最好用在刀鋒上。

近排黛安收到風，城中就有一個抵玩之處將會於暑假降臨，係邊度？之唔係迪士尼囉﹗嚟緊暑假迪士尼會推出學生專享的夏日通行證計劃，只要畀$759，由即日起到8月4日可以無限次入園區玩，玩足11個星期喎﹗搞到黛安都好想重回18歲啊。

換神盾局特工身份證

只要你係3至25歲的香港學生，拎住相關身份證明文件或者全日制學生證，通過官網或者喺樂園正門售票處就可以買到呢張通行證，下個月14日起仲可換番個人神盾局特工身份證，夥拍美國隊長、蜘蛛俠呢啲Marvel超級英雄一齊出任務，聯手儆惡懲奸﹗真係玩得又慳得，爸爸媽媽不愁仔女無暑假活動啦。

咁神盾局既然廣招「特工」，自然係因為好多超級英雄會喺暑假駐守迪士尼啦。園方喺下個月14日至9月3日會安排鐵甲奇俠、美國隊長等巡視樂園，見到佢哋記住「打卡致敬」；「特工們」仲可以喺展藝館體驗同黑寡婦、鷹眼等人聯手作戰，力抗邪惡勢力的滋味𠻹。