汪明荃 奉獻50年繼續新搞作

汪明荃（阿姐）將於八月舉行個唱慶祝入行50周年，半世紀打滾演藝圈，阿姐早已是無綫鎮台之寶。她直認TVB人工唔高，但歸屬感搭夠，兼且獲同事尊重，令她決心留效，至今已達46年︰「有得做我都會盡量做，我任何年紀都沒想過離開，去第二度又要重新適應！」

今次50周年紀念騷，尾場更是她70歲牛一，阿姐當然隆重其事，紅館騷的舞台夠靚又夠誇之餘，她亦將會以靚歌會知音。阿姐透露個唱會分為70年代、電視劇金曲等不同階段，揀選的全屬觀眾耳熟能詳的歌曲。她說︰「通常都是這些特別日子搞大騷，1987年我都幫TVB拍了第一個特輯《萬水千山廿載情》紀念入行20年；五年前，我亦在新光戲院搞百老滙式紀念騷，今年是入行50年，自己仲做得，當然要做！」

家英哥上台爆料

阿姐直言訪問亦相應減少，全因要盡量護聲，連電話亦不多講，但為了催谷個唱也沒辦法。她直言︰「我要向投資者負責，所以要盡本份宣傳！」提到丈夫羅家英擔任嘉賓，阿姐戲言對方必定在台上爆肚︰「觀眾鍾意睇佢講我的事，不過他應該有分寸！」

在娛樂圈中，阿姐出名敬業樂業，她不單是TVB的標誌性人物，雙方的關係亦不言而喻︰「入行時，無綫剛剛開台，我是1971加入，所以今年TVB慶祝50周年台慶我都要幫手拍特輯，應該在完成個唱後開始搞！」

轉戰粵劇證身價

經過那些年，阿姐直認享受能夠做自己喜歡做的事，因此，即使在TVB人工並非特別高，但卻很有歸屬感。她坦言，現時內地一個騷幾十萬，但回想入行初期，香港市場細，當時她只是計月薪，但就將演藝工作當作長期事業看待，絕非只是一份工而已。

除了電視圈，阿姐近年醉心推動粵劇，凝聚業界力量，她回想道︰「我有段時間沒有拍劇轉去搞粵劇，好多叔父輩覺得我是行外人，好似家英哥都是叔父輩，初時覺得我半桶水，之後我成為八和主席造就了對粵劇界的影響力，起碼引入辦公室制度及電腦存檔，帶領業界推動得好些！」事實上，阿姐帶領原本青黃不接及面對行業萎縮的粵劇界殺出一條血路，除了成功爭取戲曲中心作長期表演場地，亦為業界培育新血，演活人生的「最佳女主角」。

化粧︰Stephen Lau@StephenMakeup

髮型︰Jacky Au@Haircorner

服裝︰Harvey Nichols HK

首飾︰六福珠寶

場地︰好酒好蔡

撰文︰Steven

攝影︰梁細權

編輯︰黃寶恩

設計︰Ｋ