早與女友同居 陳柏宇婚後即造人

陳柏宇（Jason）、草蜢等昨日出席《2017華語金曲獎頒獎禮》記者會，將於七月做「老襯」的陳柏宇，笑言婚後會與老婆符曉薇積極造人，「我哋一齊住咗年幾，一路計劃會結婚，所以之前一齊住磨合下。」

目前正籌備婚禮的陳柏宇，表示過程十分麻煩。「好似回禮、印帖咁，雖然有搵人搞，但有啲事都要自己搞，之前以為好簡單，但原來真係好多嘢處理。」幸好他沒有因此與未婚妻吵架，更笑說將自己身家全給予未婚妻，「我嘅錢即係佢嘅錢，我話佢用晒我啲錢之後，就要用佢自己個啲。」

草蜢將推出廣東碟

同場的草蜢笑說：「我哋唱過廣東話、國語、閩南話歌，算係樂壇中流砥柱。」他們將於11月在紅館開騷，又預告即將推出廣東唱片。提到入圍今年台灣金曲獎「最佳演唱組合」，他們表示十分開心︰「到時有時間會出席，攞唔攞到獎順其自然。」

撰文︰李潔盈

編輯︰林梓添

設計︰梁政敏