未夠三個月唔講得？

「我有咗三個月先同屋企人講。」「咁遲？你怕BB小器呀？」「我怕自己小器咋！」未夠三個月唔講得，係上一輩留畀我哋嘅傳統想法，但好少人將家人列入「不能說的名單」，朋友Candy嘅做法乍聽罕見，想深一層卻是聰明。

「你知啦，一有咗咩都要戒口，呢樣唔准食、嗰樣唔畀飲，自己嚴控飲食尤自可，人哋ban你自然唔高興。」咁又係，女仔係比較敏感。

「仲有，如果你屋企人極度恨抱孫，佢哋一知你大肚，好可能做出一啲過分緊張嘅舉動，例如買好多自以為有益嘅嘢畀你食、限制你嘅活動……太早講，自己未ready，又要疲於應付家人嘅期望，何必呢？」佢咁講確有道理。

其實喺懷孕初期，我哋最需要嘅唔係同人分享喜悅，而應第一時間了解自己嘅需要，譬如飲食上有何注意、有咩要避免、有邊啲早孕期徵狀會出現、有無一啲檢查要預先book定……

試幻想下，若然你本身「一嚿雲」，屋企人想喺你陀B過程幫手或插手，你都無基礎知識去招架。

由於Candy夠口密，喺懷孕頭三個月有足夠時間做好資料搜集。佢喺講畀屋企人聽之前，已做咗初次產檢，知道有咩做得、有咩唔做得，比較咗各種分娩方法嘅利弊，亦清晰未來幾個月有咩檢查要做。當有人對佢講一啲似是而非嘅dos and don'ts，佢大概分辨到邊啲係有所根據，可以從容面對。

（本欄逢周一、四刊登）