Audrey Ng
Audrey Ng

產假小知識

發佈時間: 2017/06/19

以前曾經羨慕公司啲大肚婆,覺得陀B都幾好吖,做產檢可以奉旨攞病假,臨盤之際又可放前四後六嘅有薪產假,放個悠長假期,你話幾爽呀?

直至自己生咗仔,先至明白箇中辛酸。無論你有幾多時間,對住初生BB根本唔夠用,唔夠瞓又要起身餵奶,仲未計三日唔埋兩日帶佢去健康院,簡直人都癲。

不過言歸正傳,有產假、有糧出已經幫大忙。朋友早年嫁去美國就無呢啲福利,未坐好月已要復工,真係戥佢辛苦。講起產假,話說我喺懷孕初期同公司傾產假嗰陣,先發覺自己對此有唔少誤解,經消化後分享以下三大重點︰

一、十星期產假,連周六日計算。一直以為放產假好似攞Annual Leave(AL)咁,平時七日旅行,扣除星期六、日,只要攞五日假就得,所以我開初仲妄想,有十星期產假、即係有70日AL可用,以五工作嘅思維計算,仲以為自己可放14個星期大假,結果當然係畀人事部姐姐笑我「很傻很天真」啦!總之,十星期產假係連埋星期六、日咁計,唔會畀多你。

二、產假撞公眾假期,無得補。若然咁好彩,喺法定假期間放產假,唔好意思,公司都唔會補畀你。難怪曾經聽過啲媽媽因為喺聖誕、新年時放產假而變相蝕咗。

三、產假期間,人工八折。根據勞工處資料,產假期間嘅人工,係以過去12個月每日平均工資嘅五分之四計算,簡單嚟講就係出八成人工。有啲福利好嘅公司會full paid畀員工,可惜這些機會不屬於我呢。(本欄逢周一、四刊登)

撰文: Audrey Ng 80後P牌媽咪,由懷孕280天起分享陀B湊仔歷程
欄名: B經之路