王浩信盲人律師《踩過界》

王浩信在《不懂撒嬌的女人》演出大獲好評，一曲《陪着你走》冧盡老中青女性。今次新劇不再做貼心暖男，改為擔任視障律師，追求公義與平等，未知新劇會否延續Saving哥的魅力電暈一眾港女呢？

新劇角色無論造型、背景設定都似足美劇《夜魔俠》，引來抄蹺質疑，監製林志華直指︰「呢部唔係一部超級英雄片，王浩信角色有超強嘅能力，但唔係有超能力，佢苦練30年，比旁人辛苦100倍，鍛練出超乎常人的聽覺、嗅覺、視覺同觸覺，係外國都有好多真實例子，盲人都可以生活自理之餘又有超強四感。」

監製指觀眾應將焦點放回劇集內容上，因劇中想傳遞很多信息給觀眾，「而家好多人將眼睇到就信以為真，但可能只係事實一部分，套劇想帶出要知真相就要用心眼，即係靠聽、靠睇、靠問去配合。」

為弱勢社群發聲

除了用心眼了解真相外，新劇亦涉及弱勢社群屢被歧視的實況，「大眾習慣欺凌弱勢嘅人，令到佢哋自卑同自我否定，其實常人眼中嘅缺陷，只是每個人特徵一部分，我哋應該要尊重，弱勢唔代表失敗，就好似王浩信眼盲心不盲。」

三大吸睛位

親身體驗視障生活：監製大讚王浩信拍攝時身兼兩劇在手，仍盡用空閒時間到盲人協會上堂、參與盲人導賞團，學習視障人士的特徵和生活習慣，觀眾可期待他在劇中神似的表現。而蔡思貝亦有學盲人打字法，學習與盲人溝通。

延續EU情侶檔：王浩信、朱千雪繼《EU超時任務》飾演情侶後，在新劇再續前緣，扮演已經分手的戀人，監製大讚二人延續在《EU》中的默契，合作無間。

四角關係撲朔迷離：女主角李佳芯劇中與張振朗是曖昧關係，而蔡思貝則暗戀王浩信，劇中一幕，李佳芯在王浩信家中激吻，卻被其餘兩人撞破，劇中的感情綫錯綜複雜，追看性爆燈。

撰文︰陳麗娜

編輯︰林梓添

設計：nc