0.7cm的邂逅

「第一次透過超聲波邂逅腹中小生命，好幸福吧？」「簡直又喜又驚。」

猶記得陀B近兩個月，老公特登請假陪我去醫院照超聲波。出發前我滿心期待，幻想醫生用儀器喺我肚皮上碌下碌下，然後我緊握老公隻手，淚光閃閃咁望住熒光幕上嘅愛情結晶……

可惜，以上溫馨橋段，未有喺我嘅超聲波初體驗中出現，而且過程仲有小小驚嚇。

驚嚇，其實緣於我孤陋寡聞。皆因我從來都無諗過，原來照超聲波都要由下體放入儀器去照！

一開始，醫生都有嘗試喺我肚皮照超聲波，但由於BB太細，咩都睇唔到，於是佢立即話要幫我「喺下面照」。當時我完全唔知係咩一回事，只見姑娘喺病房拉起布簾，叫我老公去外邊等；同一時間，醫生迅速戴上手套，喺床邊拎出一支棍狀嘅掃描器出嚟，睇住佢一邊幫儀器戴condom，一邊叫我腿張開，你叫我點會唔驚青？

後來先知，原來當時照嘅「陰道超聲波」，都係一種好常見嘅產前掃描方法：將儀器放到陰道，就可睇到骨盆腔內結構，比起喺肚皮上照清楚好多，能夠準確知道胚胎所在位置，以判斷BB有無喺子宮以外受孕（俗稱「宮外孕」）。

幸好，過程都唔算太難受。當我望見熒光幕上嘅畫面，不安亦驟然緩減。雖然當時我見到嘅，只係一個0.7cm大嘅胎囊，但喺我眼中，已經係一個小生命。由嗰一刻起，開始覺得責任重大，對飲食同生活亦更加小心。

（本欄逢周一、四刊登）