實際啲功利啲長遠啲

發佈時間: 2016/07/29

幾多千年,水患水利,一念之差,防洪堵塞,抑或疏導排洪,此一時彼一時也。

試過呢個方法呢個人做極唔得,仲愈做愈令人信心喪失,咪試下其他方法其他人,好平常喎,死牛一面頸,七傷拳傷人也自傷,咪咁傻。

防洪排洪,同做生意差唔多,都係成敗論英雄。業務不振,前景黯淡,換個老謀深算嬉皮笑臉,或者面懵心精鐵青口面,都好過樹敵太多固執己見,「對人不對事」,拎嚟義正辭嚴,對住大媽講下就可以,現實中,人同事,分唔開。

明知積怨太深,成見太多;明知化解唔開,不容水火;明知人心背向,政不通人不和,歸屬感自豪感團隊精神,與日俱降;搵個識溝通,或者識扮溝通;搵個一家大細無咁惹火,或者屋企移民咗;搵個誠實啲,或者語言偽術低啲;搵個多啲人欣賞,或者少啲人討厭;搵個多啲人願意幫拖,點都好過嗰個耍手擰頭𠵱𠵱哦哦;事半功半,都好過事倍功半囉。

窮則變變則通,有得變,好過死咕咕一成不變,勉強無幸福,消耗所剩無幾鬥志,攬炒一鑊粥。「光榮」引退或者馬前換卒,博一博重振聲威,保大好江山,咁簡單道理,唔使水利專家,沙頭角村姑都明喇。

香港地,實際啲功利啲長遠啲以人為本啲,醒啲正常啲內耗少啲結果多數好啲,係咪開心啲,唔知,但肯肯定唔會差啲。

「老婆,咁簡單嘅道理,你明唔明?」

「老公,你咁嘅資質都明,我點會唔明。返工做唔到成績,換第二個試試,天公地道,我唔係話你,你明唔明?」

「……」

(本欄逢周五刊登)

撰文: 莊偉忠 崇尚反璞歸真的營商信念,以人為本的CEO
欄名: 有種CEO叫做莊