屈臣氏撑環保回收 「給塑膠一個再生機會」

我哋日常生活用到好多塑膠容器，水樽、洗手液、沐浴露，每次用完大家可能隨手就放入垃圾桶，結果香港人每日平均棄置膠樽達到528萬個，數字相當驚人。從今日開始，大家手上每個塑膠容器都有更好去處，因為香港屈臣氏好有心思，今年再度推動「塑膠容器回收計劃」。

聽屈臣氏市務總監張欣欣（Jacqueline）講，「舊年得到好多回響，今年再接再厲，搵埋世界綠色組織（WGO）合作，聯同屈臣氏蒸餾水及碧瑤綠色集團，擴充計劃，用行動表示品牌唔止重視顧客需要，亦照顧埋地球先生。」

與WGO合辦環保工作坊

舊年屈臣氏主要回收自家品牌產品塑膠，今年更進一步，任何品牌個人護理用品塑膠容器、瓶裝水水樽都可以拎去分店。Jacqueline話，不限牌子係想鼓勵更多人參與，同品牌一齊為環保出力。此外，品牌仲準備埋「獎勵」，大家每將1個塑膠容器或水樽交到分店畀職員或放入回收箱，都可得到1張95折優惠券同1個電子印花，儲齊10個印花可以參加屈臣氏同WGO合辦嘅環保工作坊。

WGO行政總裁余遠騁都大讚計劃「畀膠樽一個再生機會，大家更加留意到，唔好隨便就當係垃圾」。余博士又提到，8月底推出嘅環保工作坊，會以親子形式，等大家了解多啲膠樽可以upcycle嘅用處。除此之外，WGO仲透過屈臣氏平台發放環保生活心得，等大家學多啲𠻹！