金鐘McDonald概念店一歲喇！

全球首家、位於金鐘海富中心嘅麥當勞概念店，今日剛好踏入一周年，呢間店除咗標榜簡約而high-class，宗旨係顧客導向，所以會提供送餐及叉電等貼心服務，所以雖然位於上班區，但一年來吸引咗唔少「假日客」來體驗下。

麥當勞概念店總經理Calvin Kwan同黛安講，呢一年見證住麥當勞每項新計劃落實。佢最難忘係遊客對概念店嘅正面評價：「有位來自俄羅斯客人一入到嚟就覺得好驚訝，因為佢哋從未見過咁嘅麥當勞，覺得好舒服，仲特登拎電話直播畀朋友睇。」

呢間麥當勞概念店另一獨家賣點就係新鮮沙律，Calvin話沙律吸引到唔少OL，既健康又飽肚，但佢話暫時只有呢間概念店至有，睇嚟想keep fit嘅黛安，都係要去金鐘食喇！

黃昏轉Mood 燈光調暗

黛安曾經喺黃昏時間經過概念店，外邊望落覺得好有高級西餐廳感覺，完全唔似快餐店，原來設計內有乾坤。概念店設計師Tess Hui透露，每日到黃昏7點開始會慢慢調暗燈光，令餐廳環境更加柔和同高雅。對於自己嘅設計，Tess好滿意，仲話成功營造咗「客人旅程」呢個concept，「由入門買嘢食、到取餐、甚至用餐，整個過程都冇壓力，寬闊嘅通道同專人服務，帶畀客人感覺通透而舒服。」雖然得到唔少客人like，但Tess覺得要不斷收集意見，每日改進先可以滿足客人需求。