煤氣開班教煮法國菜 尖子可到米芝蓮餐廳受訓

想食正宗法國菜未必要飛去法國，有冇諗過自己都可以成為法國名廚？法國廚師會（Disciples Escoffier）兩年前同煤氣烹飪中心合作，引入全港首個法國烹飪藝術文憑課程，嚟緊2月將會再次開班，名額12個。法國廚師會香港區主席兼課程總監Vincent Leroux更會喺咁多屆課程中挑選最頂尖嘅學員，親身到法國嘅米芝蓮餐廳學師𠻹。

梁祖堯：辛苦過排戲

演員梁祖堯（Joey）就係課程首屆嘅畢業生，佢就話可去法國學師係珍貴嘅經驗，好期待呢次機會。佢又形容煮法國菜最難嘅就係堅持：「整法國菜所用嘅時間好長，不論係整嘅過程、甚至出嚟嘅賣相，要求都好高，可以話仲辛苦過排戲。」雖然係咁，但佢都好享受過程，仲話學廚令佢演戲更加細膩，可以話一舉兩得。

課程分別有初、中同高3個級別，各需180小時，除咗教授正宗法國菜烹調技巧，簡單如揸刀，以至設計「餐廳級」賣相造型嘅菜式都會教，完成課程及考試，就可得到法國廚師會頒發「法國Escoffier烹飪藝術文憑證書」啦！讀完3個級別考試後，法國教育部會頒發「法國廚藝訓練第五級證書」，等於可以喺法國做執業廚師或開法國餐廳。

黛安噚日試食咗Vincent同Joey兩師徒嘅傑作——法國皇室貴族專享嘅松露鴨肝釀全雞，凍食仍然肉質滑嫩，食完當堂覺得自己變咗法國貴族。