克勤孖老婆歎煲仔飯慶生

前日是李克勤49歲正日生日，晚上到無綫為慈善節目錄影，收到大會送上蛋糕祝賀。當然，唔少得老婆盧淑儀與自己慶祝，兩人更搞搞新意思，齊食煲仔飯共度這個大日子，相當sweet！

簽約英皇後，克勤多了機會上無綫節目，即使前日生日也要開工，在TVB錄影廠度過49歲生日。講到正日生日也要工作，克勤說：「麻甩佬冇呢啲嘢，好多時生日都喺工作中度過，其實星期日已經同小朋友食飯慶祝咗，個仔整咗張賀卡畀我，好開心呀！」與太太盧淑儀又怎樣慶祝？他說：「生日前突然想食煲仔飯，就揸車去咗大埔食。男人的浪漫，食個煲仔飯，冇乜所謂，大時大節都係搵個藉口同一家人食餐飯。」至於太太送了甚麼禮物？克勤笑稱是貼身物品，自己一定鍾意。

克勤又稱今年平安夜要到上海演出，幸好之後有幾日假期，可以帶小朋友到外地滑雪。克勤笑言小朋友明白爸爸要工作賺錢，否則他們何來有禮物呢！

好友買蛋糕排隊賀壽

克勤在圈中人緣甚佳，身邊不少朋友特登買定蛋糕為他慶祝。克勤於社交網站上載兩段食蛋糕的片段，胡蓓蔚捧住蛋糕說：「今日我訪問嘅主角生日呀！」之後有陳貝兒和李浩林跟壽星仔講生日快樂，克勤亦留言多謝大家。

撰文：Pauline

編輯：黃寶恩

設計：梁政敏