【聲明】港生活網站並無進行電話推廣活動

「黃金一代」發揮正能量 回饋社會

發佈時間: 2016/12/13

醫療發達,人類愈來愈長壽,香港人壽命喺全球向來都數一數二!黃金時代基金會聯同中信銀行噚日舉辦「12.12黃金智齡日」,鼓勵「黃金一代」即係45歲或以上、準備退休同已退休人士過一個有意義嘅人生下半場。好似香港第一位女傑青華麗娜,佢雖然下個月已經81歲,但黛安見佢容光煥發,原來佢話希望每日都用「新娘的面孔、情人的心態」去見任何人,難怪成日四圍飛,培訓退休人士建立第二事業啦。

同場仲有前立法會主席曾鈺成,佢話自己70歲,雖然已無精力喺會議廳開6至8個鐘頭會,亦無精力飛20幾個小時去南美見國家領導人,但就仲有能力同年輕人分享閱歷,喺大學教下書,所以佢都好鼓勵「黃金一代」積極開發潛能!黃金時代基金會創辦人暨主席容蔡美碧都話,45至75歲係真正嘅「黃金時代」,建議用唔同方式服務社會。

撰文: 黛安 消息特靈八卦公關
欄名: 八卦名利場