黛安
黛安

銀杏館今日last day 長者band友搞闊別獻唱

發佈時間: 2016/09/30

銀杏館今日last day 長者band友搞闊別獻唱

長者社企餐廳「銀杏館」位於饒宗頤文化館的分店今日last day啦,仲舉辦咗一個闊別演唱會答謝港人支持,唔好睇小一班銀髮歌手,個個氣量十足,佢哋仲臨別憑歌寄意,唱出《奮鬥》歌詞中「無論歷盡幾次浪」,只要努力奮鬥就可以「創出幸福快樂鄉」。黛安都聽過佢哋唱歌,唔止聽出耳油,仲覺得佢哋好型!

「唱歌對我是精神支持」

查實駐場樂隊一共有10位band友,全部老友鬼鬼,最年長一位已經80歲。噚日黛安同元老隊Wonderful Band嘅「老大」Patrick傾過電話,佢由自己第一首喺銀杏館表演嘅派台歌《忘盡心中情》講起,一唱就唱足4年。喺舞台上嘅他閃閃發光,完全睇唔出已77歲及曾經患癌。「唱歌對我、對其他人係一份精神上的支持,一個幾十歲的長者,能夠有活力唱歌、令人有共鳴,已經好開心。」

分享點解咁鍾意唱歌之餘,佢亦提到每次外出獻唱都帶畀佢一份體會,「舊年為一班患癌小朋友唱歌,用自己嘅經歷話畀佢哋知,只要有信念,咩都唔使怕。」呢班長者人生閱歷豐富,又充滿生命力,真係好值得學習。雖然一間分店結業,但下個月太古和油麻地分店又將開業,到時大家又可聽到佢哋嘅音樂。

撰文: 黛安 消息特靈八卦公關
欄名: 八卦名利場