粉嶺聯和墟早在1949年成立，可謂新界發展的先鋒，隨「聯和市場」的告別，小墟回歸平靜，美食之香卻崛起，先有特色番薯料理，更有中西夾雜的漢堡，再來老街坊開的家庭式食店，各有特色，難怪雖然位置偏遠，也得到不少覓食者青睞。
1. $32番薯西多士 大蕃薯
「大蕃薯」由加拿大回流香港的廖先生創辦，現時由其姐姐Jessica協助管理。
小店自08年開業至今，Jessica憶述：「當年我細佬回流想開舖，諗住揀有小鄉鎮感覺嘅地方，而聯和墟正正有呢個感覺。加上我哋住上水，返舖頭好方便。」店內食物大部分都是自家製作，由於Jessica主張健康飲食，堅持不加防腐劑，當中主打以番薯為食材的美食。
Jessica說：「老人家成日覺得番薯好平，唔係靚嘢，但其實佢嘅營養價值好高，我細佬當年曾開私房菜，用番薯做材料製作西式餅類，客人話好味，所以佢就開咗以『番薯』為主題的餐廳，而『大蕃薯』呢個名就係咁嚟。」
這裏最特別是「番薯西多士」，更成功吸引老中青食客，老人家喜愛番薯的甘甜，而年輕一代注重健康，知道番薯營養價值高，而西多士這種新潮食法就更呃Like；小店肯花心思，果然「薯」不簡單！
大蕃薯
地址：粉嶺聯和墟聯昌街7號
電話：2675 7708
營業時間：星期一、二及四至日，11:00-22:30、星期三休息（公眾假期除外）
2. $54菠蘿咕嚕堡 伊Burger Cafe
「伊Burger Cafe」早上售賣即叫即做創意漢堡，過了下午四時半就會搖身一變，成為酒吧，所以晚上會叫作「伊之吧」；日夜大不同，但同樣深受街坊們歡迎，全因食物價錢夠親民。老闆阿康以往在社福界工作，一年前機緣巧合下，幫忙負責早上的生意。
阿康居住粉嶺多年，希望為街坊帶來美食驚喜，他說：「小時候，我一直希望成為中菜廚師，不過後來發現附近大部分的餐廳，都以中菜為主，所以我就動動腦筋，將中菜概念混合漢堡之中，吸引客人，估唔到反應出奇地好。」這個創意概念，原來更吸引了一班在附近工廠工作的男士光顧，因為他們都認為漢堡包套餐「大件夾抵食」，而且即叫即做，新鮮熱辣，填飽肚子，確實一流。
這裏的「菠蘿咕嚕堡」，混合了中式咕嚕肉製法，新鮮菠蘿輕輕燒熱，加進烘至熱辣辣的漢堡包內，酸甜開胃；漢堡肉混合自調的咕嚕肉醬汁，中西合璧，令人一試難忘。
伊Burger Cafe
地址：粉嶺聯和墟和睦路9號海聯廣場地下7-8號舖
電話：6804 3869
營業時間：星期一至日，8:30-16:30
3. $18檸檬芝士凍餅 太陽花
「太陽花」由賴小姐一家人經營，他們住在聯和墟有16年，兩年前，剛巧見到有舖位，三姊妹決定「膽粗粗」一試。
店名「太陽花」的花語是勇敢，勇於追求自己的幸福；而店內以「橙色」為主調，給人一種溫暖、有朝氣的感覺，店舖就好像一個家，給客人們在忙碌之中，加油打氣。
大家姐Aster說：「我哋三個都唔係做飲食業，當時開舖係想有個新嘗試，加上媽媽煮嘢食真係好叻，全店嘅食物，都跟隨媽媽嘅食譜而做，所以店舖食物最大嘅特色，係有種『家』嘅味道。」
店內的「檸檬芝士凍餅」，每日人手製造，售完即止，深受客人歡迎。二妹Kay說：「試過有住喺香港區嘅客人，假期專登揸車入嚟，就係為咗食檸檬芝士餅。可能味道唔係太甜，酸酸哋又開胃，吸引咗佢哋嚟啦！」
太陽花
地址：粉嶺聯和道57-63號嘉和軒地下4號舖
電話：9691 6579
營業時間：星期二至日，7:00-17:30、星期一休息
撰文：唐蔚霖
攝影：林良明
插畫︰Human Ip
編輯：余運慶
設計：大雄