尾場個唱狀態回勇 Sammi怕醜唔肯多謝安仔

鄭秀文（Sammi）的八場《Touch Mi 2世界巡迴演唱會》大功告成，前晚舉行尾場演出，雖然Sammi仍抱恙在身，但她傾盡全力又唱又跳，正如她經常提及的四個字：恩典夠用！

台上的Sammi雖然仲有兩聲咳，但把聲非常響亮，還叫Fans一齊瘋狂地嗌。尾場有重量級嘉賓古天樂，Sammi大讚古仔剛返港就趕來紅館：「你真係好有義氣，不如畀晒你副身家我啦！」而觀眾最期待古仔開金口，他起初婉拒唱歌，又澄清沒計劃在2018年開演唱會，最後Sammi花費唇舌終於令古仔投降，唱了約一分鐘張國榮的《當年情》，Sammi慫恿古仔再闖樂壇，攞埋男歌手獎。

到Encore部分仍未見許志安出現，在Sammi逐一多謝主辦單位後，觀眾不停嗌：「安仔、安仔」Sammi笑問：「點解要多謝安仔？呢啲係應該嘅，隔籬嗰件應該要撑，係咪想冇飯食呀？返到去冇床瞓呀？」

拒延期免歌迷失望

完騷後，Sammi精神奕奕出席慶功宴，問到其病情康復進度？她笑稱：「七成啦，未好番晒㗎，但比之前開唔到聲已經好好多。演唱會係一個經歷，估唔到觀眾真係咁錫我，對我嘅愛令我好感動。」Sammi又謂，今次令她見到好多好事，包括信仰上再一次經歷深刻體驗，同時亦感到觀眾真的好愛護她。

問她可曾想過延期？Sammi表示：「講一句cancel好容易，但之後有50到100人（工作人員）都要跟手尾，自己綵排咗咁耐，亦都唔想觀眾失望，因為好多歌迷由外地嚟睇我。要考慮因素太多，我不斷祈禱，希望自己可以做得好。」可幸她堅持用信心去克服困難，終於順利完成八場演唱會。

採訪：Pauline

編輯：陳禮恒

設計：梁政敏