炒車下完賽 劉鎮漢踩出體育精神

昨日一年一度單車節，黛安都有去幫參賽的姊妹打打氣，仲有幸目擊總裁慈善及名人單車賽，27位總裁名人披上戰衣，沿尖沙咀東梳士巴利道、麼地道及麼地里繞兩圈。呢兩條路佢哋平時坐車成日經過，但喺馬路「破風」相信就好少機會見到。

今次「破風行動」有新地執董兼副總經理黃植榮、執董董子豪、東亞執董兼副行政總裁李民斌等管理層參與，認真陣容強大。去年一度炒車的旅發局總幹事劉鎮漢（Anthony），今次再接再厲參賽，惟起步時因失重心跌倒，雖然出師不利，但他沒有放棄，繼續努力完成賽事。

事後Anthony仲講笑話，上年橫風橫雨跌倒，已經起咗繭，今次跌親都冇有怕！仲話自己技術未夠，下年操弗啲再來鍊車，真係好有體育精神！

比賽最後由凱迪思執行董事項目管理總監（亞洲）Andrew Macpherson奪冠，巴拿丹拿集團副董事沈應麟及新地董子豪就分別拎亞、季軍。

破風比喻扶持弱勢

新地執董郭基煇亦有參加50公里挑戰賽及隊制計時賽，後者取得第5名，佢對成績好滿意，仲話自己鐘意踩單車，又講到群體活動講求合作，當有人破風時，就可幫後面隊員慳到四成的力量，此事令他想起很多社會上的弱勢社群，同樣需要有人為他們人破風與扶持咁話。