吳鎮宇獻Sing《歲月如歌》撑Sammi 樂迷超驚喜

鄭秀文（Sammi）的八場紅館騷昨晚圓滿落幕，前晚倒數第二場邀得曾合作《衝上雲霄》電影版的吳鎮宇（Sam哥）首踏紅館高唱《歲月如歌》。不少樂迷激讚Sam哥開金口唔失禮，大喊集體回憶返晒嚟！

Sammi於本月16日首場個唱已面對失聲逆境，但她堅毅不屈的精神成功闖過難關，而每晚嘉賓亦帶來驚喜，包括劉德華、黎明、黃子華等。前晚尾二場，Sammi的聲綫已恢復得七七八八，更邀得吳鎮宇在紅館初試啼聲，演唱其主演的經典劇集《衝上雲霄》主題曲《歲月如歌》。雖然Sam哥輕微甩嘴，但其膽量及誠意足已贏盡正評，全場樂迷嗌爆紅館。Sammi指Sam哥原本打算以蛋撻頭及飛機師制服演出，她即取笑好友：「我話使唔使咁行呀？」

爆Sam哥上台超緊張

此外，Sammi踢爆Sam哥為處男演出找歌唱老師學足六堂：「唔好睇佢扮晒老定，其實隻手濕過條啱啱洗濕嘅底褲。」不少樂迷對Sam哥驚喜獻聲超感動，高呼《歲》曲的音樂響起已重拾集體回憶。至於Sam哥，昨晨也在微博分享與Sammi的後台合照及其台上照片，似乎如釋重負，他寫道：「終於！唱完了，第一次公開唱《歲月如歌》，當世事再沒完美，今晚也沒唱完美，人生不完美無處不在，要的是一份勇氣。」另一邊廂，Sammi亦轉發二人首度在紅館合作的照片及片段，並留言感謝Sam哥。

協力：Jenni

編輯：黃寶恩

撰文：Steven、Pat

插圖：何樂

設計：梁政敏