【聲明】港生活網站並無進行電話推廣活動

揭盛智文成魔之路 $666教你鬼上身

發佈時間: 2016/09/21

每年海洋公園哈囉喂畀鬼嚇到慌失失,今年終於有機會「報仇」嚇番人轉頭,因為海洋公園即日起推出「嘩鬼訓練營」,遊客可一試「鬼上身」,海洋公園主席孔令成、副主席劉鳴煒、營業及市場執行總監李玲鳳同大樹灣發展項目籌劃小組榮譽顧問盛智文仲一齊出動嚇人,大家睇下認唔認出佢哋?

黛安有姊妹率先變身白髮妖魔,成功吸唔少遊客過來索合照「打卡」。參加者可選擇變身成猛鬼或鬼馬幽靈,紙紮公仔、潮鬼、鬼王子、白髮妖魔等等,由荷里活特技化粧師同服裝團隊幫你裝身,多達30人的團隊平均每日為50至60名厲鬼上粧。

學擺甫士 搞氣氛

之後仲會由演技大師為每隻「厲鬼」做「特訓」,學擺甫士、擺功架營造懾人氣場,學成後隨即可到海濱樂園廣場「嚇人」,最後更會獲頒發鬼證書同紀念品,費用每人666元,名額只有180個,要玩就要快啲報名,先到先得架!

撰文: 黛安 消息特靈八卦公關
欄名: 八卦名利場