【聲明】港生活網站並無進行電話推廣活動

中電工程師作曲 莊偉茵歌頌節能

發佈時間: 2016/09/21

保護環境除靠身體力行,有醒目頭腦都好重要架!中電昨日就搞咗個環保節能機構嘉許計劃,讚賞一下諗到「好蹺」的工商機構。好似有商場員工主動向公司獻計,諗到收集商場冷氣系統排出的冷凝水,配合通風系統冷卻鮮風幫停車場降溫,仲足足跌咗5度咁多,客人嚟攞車自然清涼又舒服啦,真係抵攞到環保獎。

妙韻頌環保獎得主

中電工程師仲作咗首歌,請埋中電企業發展總裁莊偉茵(Quince)齊齊唱出清涼停車場優點,真係令一聽難忘。

仲有街巿豬肉檔改用咗慳電的LED,照到啲豬肉一樣咁靚,唔似傳統鎢絲燈泡又熱又嘥電,喺檔口企耐啲都照出雀斑。公關姐妹話,今年嘉許計劃有6,000個申請,涉及600間機構,唔少中小企同小店都有份攞獎,連深水埗明哥都有節能星探金獎呀。

撰文: 黛安 消息特靈八卦公關
欄名: 八卦名利場