幫保良局籌款 60架Harley鐵騎大巡遊

好型呀！一班Harley鐵騎士昨在港島區路上浩浩蕩蕩馳騁，吸引唔少途人艷羨目光，原來係美國電單車品牌Harley-Davidson昨舉辦本港首個官方慈善電單車環島遊，60名鐵騎士沿港島海濱巡遊，幫基層學生籌款，Harley更贊助一架特別版FORTY-EIGHT，11月初舉行拍賣。

雷頌德帶隊

車隊在品牌大使兼音樂人雷頌德（Mark）帶領下，由保良局銅鑼灣總部出發，由港島南區往西區新海旁，再駛至港島東，終點站係赤柱廣場，每位騎士捐出唔少於500蚊畀保良局。

本身係Harley粉絲的阿Mark話，呢種活動喺國外十分盛行，好高興見到香港有Harley巡遊，加上為保良局籌款，活動更有意義。Harley香港區總代理AWN Motors HK Limited代表Mr. David Neilsen，都係「忠粉」達20年，佢話Harley品牌特質之一係手足情誼，更關心社會需要協助的人，所以今次希望幫到保良局成績優異的基層學生，做埋語文培訓，但未定下目標籌款額。