黃埔AEON大翻新 朝聖兼買沖繩特產

日本，可能係香港人最鍾意去嘅地方，和式美食就更加令人趨之若鶩。「AEON STYLE黃埔」最近就同日本沖繩縣政府合作搞咗個「沖繩觀光物產展」，將沖繩最正的美食「直送」香港﹗當中唔少得沖繩原生品種「阿古豚」豬肉，香甜得來膽固醇亦較低，而且沖繩和牛啲肉質都特別細緻嫩滑，最啱大食一族。食完再歎番杯物產展獨家發售的ORION STYLE啤酒，成口清爽麥香味，咁就「一級棒」啦﹗

公關姊妹仲話，原來「AEON STYLE黃埔」今個月先換新裝再開幕，仲係全港第二間AEON STYLE店𠻹。翻新後比以前更有時代感，好多朋友都特登揸車去朝聖。除咗有精選日本美食同貨品，店內仲提供60分鐘免費WiFi服務，又有冷凍儲物櫃借畀客人放美食「戰利品」，特選客戶仲可以去貴賓休息室食免費小食同幫電話叉電，真係貼心又舒服！