好戲強人回巢 智叔方中信鬥到出面

電視圈流行中佬，除了年輕小鮮肉難擔大旗之外，最重要是中生演技成熟有說服力，正好符合對劇集要求高的觀眾。新劇《律政強人》有「民間視帝」廖啟智搭型佬方中信，二人西裝骨骨在律師樓鬥到你死我活，令人相當期待。

《律政強人》有別於一般瘋狂上庭打官司的法律劇，劇情主要講述律師樓內的明爭暗鬥。監製羅永賢笑言角色設定猶如現代版的《琅琊榜》：「律師樓創辦人劉丹就好似皇帝咁，為咗令公主李佳芯坐穩江山，所以特登搵方中信扶助，制衡有野心嘅老臣子智叔。三個主角代表嘅價值觀都唔同，李佳芯代表公義、方中信貪錢、智叔貪權。」

三位主角擦出火花

智叔在劇中扮演老奸巨滑的律師，羅永賢表示角色是為對方度身訂造。「佢（廖啟智）好戲就唔使講，今次佢奸到出汁；方中信則好淡定，佢近年拍好多內地劇，見慣大場面，面對智叔嘅戲佢都接到招，好壓場。」至於，夾在中間的李佳芯首當女主角，羅永賢笑說：「佢嘅孤狸精形象來自《名門暗戰》，套劇正正係我做監製，今次一手摧毀我建立畀佢嘅形象，佢亦表現好好，好正氣。」

撰文：李潔盈

編輯：林梓添

設計：梁政敏