12月紅館開四面台 學友：感受到壓力

歌神張學友相隔四年，今年12月在紅館舉行《A Classic Tour》巡唱香港站。強勢回歸的他一次過開賣20場，學友坦言有壓力，提早閉關練歌排舞，已在屋企練足100場，但他苦笑謂妻女似乎不大欣賞，冇乜反應。

張學友於12月4日起舉行20場《A Classic Tour學友．經典》演唱會，他表示：「每隔三日會休息一日，呢個係我要求嘅演出模式，希望有足夠時間休息，確保達到自己接受嘅水平。」

加場要問屋企人

大會昨日豪花百萬在尖沙咀舉行記招，學友一出場便踏上迷你紅館，他說已有20年未開過「四面台」，舞台經驗豐富的他，亦承認今次開騷有少許壓力，深深感受到數字的壓力，他笑言一方面期待開騷，一方面又擔心這個年紀是否應付得來。問他會否苦練腹肌，讓觀眾一飽眼福？他斬釘截鐵表示：「冇諗，依家呢個身形已經最fit，哈哈！」他又拒絕「細佬」張家輝上台，但歡迎對方捧場。

是否考慮加場唱到2017？學友說加場與否並非由他決定，屋企都有決定權。問他可有飛債在身？學友笑言：「冇，因為我來者不拒，會盡力接所有order。在屋企練歌練舞，不過may may（羅美薇）似乎無乜癮。（咁兩個女呢？）佢哋都無乜興趣，好慘。」

採訪：Pauline

攝影：Lego

編輯：陳禮恒

設計：梁政敏