恒隆高層齊撑數學獎 陳文博升執董派新卡片

近人最多人講嘅新聞肯定係特首選戰。噚日係恒隆數學獎頒獎禮，主人家恒隆董事長陳啟宗致辭時，向主禮嘉賓、正積極考慮參選嘅政務司司張林鄭月娥講，可請在場嘅數學精英幫佢計下當選嘅機會率。作為數學家林兆波太太嘅林鄭轉數亦好快，引述丈夫話「生活唔係談論機率（probability），而係應該考慮無限可能（infinity）。」雙方妙語連珠，認真精采。

翻新山頂廣場

除咗陳啟宗之外，黛安亦喺會上遇見多位恒隆高層，包括恒隆董事總經理陳南祿、助理董事（集團傳訊）關則輝及陳啟宗嘅公子陳文博（Adriel）。Adriel向黛安派新卡片，原來佢上月剛升任做恒隆集團及恒隆地產執董，雖然工作無咩變化，但佢話責任同壓力都大咗，嚟緊將因應社會消費及購物氣氛變化，翻新山頂廣場，工程會交由建築設計公司Aedas負責，其實恒隆於無錫、大連及武漢等多個項目，都係出自呢間名牌公司手筆，經驗夠晒豐富。

講番恒隆數學獎，今年金獎得主由何明華會督銀禧中學嘅梁辰楷奪得。恒隆數學獎執行委員會主席、中大理學院副院長（教育）區國強大讚參加者水平高；提到攞金獎嘅梁辰楷，評審仲話佢嘅數學水平達到博士級數，非常厲害。最令黛安欣賞嘅係項目唔止表揚學生，得獎學生嘅老師亦可獲資助進修，故此深受學界支持，每年有不少隊伍參賽㗎。

原來林鄭嘅老公林兆波昔日都喺中大教書，同區國強係舊同事；更巧合嘅係，另一名評委、香港教育大學數學與資訊科技學系助理教授張家麟，則係林兆波於中大任教時候嘅學生，可謂世界真細小。