【聲明】港生活網站並無進行電話推廣活動

日賣3000碗 越南最好味牛河apm開店

發佈時間: 2016/12/16

香港美食包羅萬有,黛安最近同太興飲食集團董事兼總經理(品牌及企業發展)陳淑芳(JoJo)傾開,佢透露集團已同越南最好食嘅牛河店之一「錦麗」傾好,下個月衝出越南,來港開第一間分店!香港人有口福啦!錦麗1970年於越南開業,曾經喺一天內賣出超過3,000碗牛河(舖頭稱之為雜錦粉),被《華爾街日報》譽為越南最好食雜錦粉,唔止受當地人同遊客歡迎,食家蔡瀾、葉澍堃食過亦大讚好味!

JoJo話希望港人唔使搭飛機,都可以食到清甜醇香嘅雜錦粉,所以今年初開始,佢同管理層已經多次親身飛去越南,同「錦麗」老闆傾開分店事宜,更派出師傅專誠過去學師。佢透露錦麗本身只賣雜錦粉:「我哋明白香港人喜歡食唔同種類嘅越菜,所以分店仲會加入幾款小食。」分店投資高達7位數字,希望盡量趕喺農曆新年前喺觀塘apm開幕,等大家可以食好嘢過年。

撰文: 黛安 消息特靈八卦公關
欄名: 八卦名利場