紅地氈上撇甩朱晨麗 洪永城黐番唐詩詠

洪永城與女友唐詩詠前晚出席電影《俠盜一號：星球大戰外傳》首映禮，場面星光熠熠，大會安排兩人一組行紅地氈，但洪永城不是拖着女友唐詩詠出場，而且愈行愈心急，結果與拍檔朱晨麗變成「前後腳」，唐詩詠則挽着梁烈唯的手踏上紅地氈。

洪永城獨自行紅地氈一臉尷尬，事後他笑謂：「我太失禮，冇風度，要同朱晨麗道歉。原先公司安排我同佢行，唔知邊個推咗我出去，我仲以為鬥快行完紅地氈有禮物。」提到女友詩詠未獲安排跟他行紅地氈，洪永城表示依照公司安排，他又謂：「詩詠同梁烈唯一齊，十分安心，因為唯唯靠得住。（覺得馬國明靠唔住？）公司安排啦！」

40藝人撑Ad fun

當晚活動由無綫Ad fun贊助，所以出動超過40位藝人捧場。唐詩詠當晚打扮密實，她自言已經騷長腿，問她是否男友不批准？洪永城立刻否認：「好嘢留到頒獎典禮，壓軸嘛，次次好嘅就唔知邊次好。」詩詠則表示頒獎典禮的戰衣仍未有定案，她認為不一定性感，最緊要靚。洪永城會否親自為詩詠設計戰衣？他又笑謂：「我會加啲旅遊元素，好似尼泊爾、西藏啲布，我諗佢一世都唔會着，似個村姑。」詩詠也一口拒絕他的「好意」。

黃宗澤（Bosco）曾公開讚龔嘉欣的演技，她坦言之前完全不認識Bosco，沒想過一部劇之後，這位前輩在公開平台稱讚她，故她亦會投視帝一票予Bosco。提到頒獎禮戰衣，嘉欣透露訂造了一套金色透視裙，她笑言畢竟都大了一歲，不能再裝可愛了。

撰文：Pauline

編輯：陳禮恒

設計：梁政敏