愈來愈多政府高官開facebook同市民溝通，不過黛安始終對早早投入互聯網世界、每星期風雨不改寫網誌嘅財爺曾俊華最關注，鍾意聽佢分享往事。噚日，財爺就喺今年首篇網誌分享有關習武故事。

眾所周知，財爺後生「百足咁多爪」，識玩劍擊之餘，仲有深厚嘅武功底子，事關佢喺美國讀書嗰陣，已經跟師傅鄺鐵夫習洪拳，平時大家睇黃飛鴻電影，飛鴻哥所耍嘅「工字伏虎拳」、「鐵綫拳」同「虎鶴雙形拳」都難佢唔到。

豎起防撞床褥

除咗洪拳，財爺對武當一炁（音：氣）五行門亦有認識，皆因佢師公吳錦鎏正係呢門功夫嘅奇才。佢話每次鄺師傅喺美國返港，都會同吳師公喺酒店「開片」切磋，佢亦有機會同師公過兩招。不過財爺自爆，每次接唔過兩招就會被「打到飛起」！好彩佢哋每次過招前都做足安全措施，將床褥靠牆豎起，否則中招再撞牆，肯定好傷！

財爺又透露放假入戲院睇咗《葉問3》，佢直言對葉問認識唔多，但葉問徒弟李小龍就係佢偶像，對佢生活、工作同待人接物都有啟發。