張敬軒在剛舉行的三個樂壇頒獎禮中囊括多個男歌手獎項，被封為「三料歌王」，成績斐然。軒仔昨日出席新碟簽唱會時，坦言有信心在本周三的《十大中文金曲頒獎音樂會》再攞獎。
張敬軒昨日在馬鞍山出席新碟《Felix—Me & Mr.Cheung》簽唱會，粉絲上台送上花束、蠟燭及紅酒給軒仔，向來說話百無禁忌的他自嘲：「咦？差個相框喎。」引來台下笑聲。大會又安排男歌迷與軒仔大跳華爾滋，軒仔笑謂：「基味濃咗少少！」
軒仔事後表示Fans好窩心，拜山三寶齊晒，不過他說：「其實呢啲都係心意，百無禁忌。」提到大會封他做「三料歌王」，可有信心連奪四台男歌手獎？軒仔坦言希望可以食糊，卻又擔心變「小相公」，他對歌曲獎甚有信心，但個人獎就隨緣，希望今年可以多放時間在音樂方面。
睇好坤哥上位
講到近日人氣急升的吳業坤（坤哥），軒仔亦有留意坤哥的歌，得悉他的歌有數百萬點擊率，即表示：「我首國語歌儲咗四年，先有400幾萬點擊。」問他會否向網絡紅人瓊姐拉票？軒仔直言瓊姐一向待他不錯，間中會講兩句好說話，是一種支持。軒仔又自爆對瓊姐的身份感好奇，看文筆似女仔，加上對英皇藝人都好好，甚至揣測過她是否公司同事。
有指瓊姐對容祖兒特別好，軒仔坦言與祖兒傾過這問題，也諗過對方是否坐在頒獎禮上其中一位嘉賓，「依家做歌手起步容易得多，因為有網絡，我平時正經發相都唔多like，要加多啲#hashtag（標籤）同埋衰衰留言就有過萬like，依家成個娛樂圈生態都變咗，其實坤哥都係前輩嘅學習對象。」
採訪：Pauline
攝影：林良明
編輯：陳禮恒
設計：梁政敏