胡杏兒 自家婚紗店生招牌

名人開店少不了「老闆出馬」做招牌，加上圈中好友支持，猶如「曬冷」，宣傳效果不言而喻。好似新婚、做「客家新抱」的胡杏兒，上年與好友兼設計師Kev Yiu合作開婚紗店Kevolie。由影pre-wedding到大日子，都穿上為她特別設計的「The Blessing」系列，聽講只是正日行禮魚尾企領婚紗加晚宴上紅色水晶露肩透視晚裝，已鑲上過五萬粒水晶。每張相都見到杏兒甜到漏笑容，仲唔係最佳代言人？

另外杏兒與一班姊妹組成的「胡說八道會」直情輪流做生招牌，各大頒獎禮、盛宴個個着住Kevolie；仲有張嘉兒婚紗照、電影《杜拉拉追婚記》海報林依晨婚紗造型，靚衫加女神是最大宣傳！