胡定欣憑劇集《鬼同你OT》首度榮膺視后，原先與田蕊妮一齊夾錢請台前幕後食飯聚舊，可惜阿田前晚因工作缺席，而陳豪則繼續貫徹當爸後的風格，遲了一小時才現身。

遲到的陳豪抵達酒樓時，全場報以「噓」聲，他解釋因為要湊兩個仔：「呢個時間最尷尬，係湊仔最忙嘅時候，又要幫佢哋沖涼、餵飯仔、氹瞓覺，依家兩頭唔到岸，屋企未搞掂又要趕嚟，點知就遲咗咁多。（可有想過甩底？）唔得，咁開心梗係要嚟。」

陳豪自言與太太陳茵媺（Aimee）照顧兩位少爺已經手忙腳亂，第三胎即將來臨，問他們點算？陳豪笑謂：「多啲嚟密啲手。（請多個工人？）唔關事，已經有兩個，我同Aimee都主張自己湊，我覺得親子好重要。」他又稱兒子大得很快，大仔Aiden已開始講說話，成日又跑又跳。

原班人馬再拍喜劇

面對這位廿四孝爸爸，問他湊仔會否影響工作？陳豪堅稱沒有影響，當記者踢爆探班時曾見他遲大到，陳豪尷尬地說：「好忙，時間唔到我控制。」他隨即扯開話題，表示難得胡定欣請食飯，真係好開心。定欣則期待下月將與原班人馬合作新劇《來自喵喵星的你》。

撰文：Pauline

攝影：林良明

編輯：陳禮恒

設計：梁政敏