近年波士頓龍蝦大熱彈出，新餐廳爭相以此做賣點。銅鑼灣樓上新派西日cafe「Master Kama」亦加入戰團，力捧新鮮龍蝦吸引年輕客。
店名「Kama」是日文「Kamameshi」（釜飯）的簡稱，意指這裏主打與釜飯相似的暖系濃湯石鍋，配燴飯或手打烏冬。然而，坊間已有相似主題日食店，要突圍就靠加入人氣龍蝦元素。石鍋可配龍蝦濃湯或龍蝦芝士濃湯；前者湯底採西式做法，龍蝦連頭和肉，加雜菜熬足八小時至濃郁鮮甜；後者用四種芝士包括mozzarella製，芝味香濃呈拉絲狀態，滿足一眾芝士精。
身為龍蝦超級粉絲，別錯過玩三種食法的「龍蝦匯」套餐！除了龍蝦雜錦海鮮石鍋湯烏冬外，更用原隻700g龍蝦，自製龍蝦包及烤蒜蓉牛油龍蝦，套餐under $400，性價比高兼食得飽，初次來試得過。餐牌中最玩味的炸雞翼dip龍蝦芝士汁，食法如芝士fondue，龍蝦味濃縮，芝士味亦郁香，連炸薯條都可揀這款醬。還有一款龍蝦茶碗蒸，混合了龍蝦汁，蛋超滑。
曾任職Jamie's Italian
設計這些趣味菜式的俊俏暖男大廚阿山，曾在日本料理及Jamie's Italian工作，西、日菜皆精，下廚認真細心，龍蝦以外的燴法國藍青口、京風章魚大阪燒、芝麻薑汁香橙雞肉沙律等，都值得試試。置身仿英式漁市場設計的cafe，配合franc franc餐具及美式玻璃杯，感覺頗為cozy。
Master Kama
地址：銅鑼灣謝斐道500號維安商業大廈3樓
電話：3421 2129
平均消費：$200
編輯：余運慶
設計：梁政敏