港燈烹飪班 親子學整糖不甩

一班姊妹放假都會煮番幾味，臨近過年，大家話要搞搞新意思，不如一齊學整賀年糕點啦！黛安即刻search下，原來港燈家政中心好快手，已經推出賀年吉祥菜式烹飪示範班同實習班，由宴客菜式如炆鴨掌、蝦膠釀冬菇，到新春小食酒釀湯丸、糖環等等都有。

如果大家心思思，諗緊今年過年團年飯去邊度食，不妨考慮下學煮番幾道有意頭的菜式。唔想自己一個學咁悶？大家仲可以帶小朋友參加親子班，好似「親子賀年甜蜜蜜」，一齊整糖不甩同湯圓，二人收費420蚊，呢個農曆新年一於大人細路拍住上！想知道更多課程資料，可以下載「港燈低碳」手機app。