玩具展見蝙蝠車 周啟良愛不釋手

唔講唔知，貿發局署理總裁周啟良原來係大細路一名。噚日黛安喺香港玩具展預展上遇到佢，見佢對一架蝙蝠俠跑車愛不惜手。傾落先知，原來佢係蝙蝠俠忠實粉絲，每次有電影上畫佢都一定入戲院捧場。噚日黛安仲見佢即場向玩具公司負責人問晒價錢，佢笑謂的確有興趣將架車帶返屋企。

講真，呢批蝙蝠俠玩具真係好型，黛安亦好鍾意，特別係嗰架1：30、即將喺新一集電影亮相嘅磁浮蝙蝠戰機，唔單止可以浮喺半空，仲可以喺漂浮狀態變形！

另外黛安亦即場試玩過，一個憑腦電波控制嘅蝙蝠俠遊戲，只要戴上一個類似「頭箍」嘅腦電波放大器，就可透過眨眼、集中及放鬆精神，指令蝙蝠俠執行任務，好好玩。

除咗電影產品，噚日喺現場，黛安亦見識到唔少智能玩具。譬如一組3D虛擬實境（VR）眼鏡和高清航拍機，大家可一邊用智能手機揸飛機，一邊透過3D眼鏡，觀賞航拍機拍下嘅美景，就好似化身飛機師咁，實時享受飛行嘅樂趣。