AIA MPF搵杜如風拍廣告

每次同AIA MPF行政總裁馮裕祺（Stephen）食飯都有surprise，噚日大家一齊去咗堅尼地城新開、正試業的素食fusion餐廳Vanimal，佢特登學整健康飲品𠻹。黛安記得以前Stephen煮過「紅酒燴冬瓜」，今次佢就話，知個個都貪靚同想健康，於是整咗紅菜頭汁mocktail，黛安以為紅菜頭汁會有澀味，點知加紅莓、檸檬汁後，酸甜度啱啱好。

Stephen講起，AIA MPF定期會做調查，睇下受訪者退休規劃意識，發現「忘」加「忙」兩個因素，令好多在職港人RQ（退休商數，數值愈高代表愈大機會儲夠錢退休）都較低，新一年品牌特別搵咗人氣主持杜如風同電台節目主持細So拍廣告，齊齊演繹廣句口號——「一袋二袋，誰又代你想想將來？」。Stephen笑說：「杜如風愛shopping的形象好深入民心，搵佢啱晒！但唔好以為杜如風RQ低，佢個test有65分，高過細So同男神王宗堯！」

話說品牌舊年搵王宗堯同周家怡拍廣告，兩人RQ分別係50同82，咁細So呢？大家以為有家庭負擔的細So應該好有準備，原來佢得分多男神少少，係54。Stephen仲話，女士RQ高分過男士，係呢個test其中一個有趣發現。