以前想飛去澳洲黃金海岸或者大堡礁潛水，一定要轉機先去到，依家開始唔使啦！事關香港航空今日起開通香港飛黃金海岸直航，同一張機玩仲可以玩埋開恩茲，每星期三班，以後去玩又多個選擇。

噚日黛安同港航管理層食飯，聽港航首席營運官王證皓（Ben）同航空服務總監簡浩賢（Stanley）講，今年佢哋將會增設九架飛機，機隊多咗，自不然會推出更多新航點，今年目標係加開十條新航綫。

阿Ben透露，佢嘅藍海戰略係開展既有旅遊價值、而香港仲未有直航嘅地點。除咗黃金海岸，港航仲會擴展更多日本新綫路，譬如日本鳥取等。若大家有睇過《鬼太郎》或《名偵探柯南》漫畫，對鳥取呢個地方一定唔會陌生，事關該處正係鬼太郎同柯南嘅故鄉。

為咗配合發展，Stanley話今年需要增聘約1,000人，包括機師、空中服務員、地勤及工程人員等，如果想投身航空界就要密切留意啦！