賀歲片《西遊記之孫悟空三打白骨精》將於農曆新年上映，飾演孫悟空的郭富城昨天聯同羅仲謙及導演鄭保瑞到屯門出席電影宣傳。城城大呻新春期間仍要四出宣傳，情人節也會在上海度過，但如此一來豈不是可以與上海女友方媛（Moka）共度首個浪漫佳節！

活動上展示一比一的孫悟空腳踏觔斗雲的造型蠟像，但城城就嫌唔太似自己。電影將於今個月20日在北京舉行大型首映，稍後在港舉行，他希望屆時可以帶媽媽出席，那女友呢？城城即謂：「私人生活唔講了。」

對於影片票房，他表示充滿信心，雖然賀歲檔的對手相當強勁，但眾演員花了很多心血，他的孫悟空造型每次更花了七小時化粧，無論體能及身心透支都好犀利，城城苦笑謂：「化粧令到塊面無『忽』好肉，身上又着住成件毛嘅肌肉衫，熱到流汗都唔敢抹。」

城城將會走訪20多個地方做電影宣傳，除夕不能留港陪家人過年，問會否帶女友返家拜年？他立刻「投訴」：「我都返唔到屋企食飯呀！（叫佢代你出席囉！）冇得代。」屬蛇的他明年刑太歲，會否考慮結婚沖喜？他笑笑口說：「唔好講，集中工作上，之後要去上海拍《永不消逝的電波》。（情人節在上海？）去上海……工作！」

謙仔默認計劃結婚

早前相士批算今年適宜結婚的羅仲謙，他表示腦海中不停計劃一些事，但沒透露是否婚事，只說會做一些應該做的事。問他可是計劃中？他說：「咁都好正常，今年都32歲，（35歲結婚？）唔會諗時間，（先生仔後結婚？）我會一步一步來。」謙仔表示，總之結婚一定會宣布。

採訪：Pauline

編輯：黃寶恩

設計：鄧俊明