二手樓劈價浪接浪，有買家出盡牙力壓價。網民分享有買家以結婚花費多，外父索大筆禮金為由求減價；也有經紀叫業主減價當幫年輕人上車。部分業主被過分壓價，忍不住送客！地產代理指博同情的作用不大，不如引述樓市數據理性議價。

這位網民指曾有新婚夫婦睇樓，聲稱結婚花費大，希望獲減價。「又話女家個老竇老母好似賣女咁，要咗好多禮金，叫我平啲。」地產代理又以「追魂call」游說減價，業主忍不住說：「與其咁掹掹緊買層樓，供落去兩公婆都會辛苦，我唔想害佢，不如你叫佢搵間平啲啦」。

或因同情減一萬幾千

大部分網民直指，與買家非親非故，「就算你死人冧樓，有幾煽情嘅故仔都無用」。另有買家指曾帶親友睇樓，因親友不斷貶低單位裝修殘舊，業主忍不住回敬「唔好阻大家時間，係鍾意嘅大家坐低慢慢傾價錢，唔好無嘢搵嘢嚟彈」，最後更開門「送客」。

美聯物業住宅部行政總裁布少明指，部分客人以私人理由博同情，期望業主減價，「十個有兩、三個係咁，有些說買層樓孝順父母，也有人說子女供書教學負擔大」。但他形容這些同情分最多有助「減一萬幾千」，作用有限。

切忌踩低單位或說嫌貴

反之，布少明認為若代理向業主分析樓價走勢、與同區屋苑比較及單位缺點，了解業主是否急於出售，譬如換樓及移民等，則有助議價。他又指睇樓最忌有「塘邊鶴」邊睇邊踩低單位，「例如批評西斜、低層或裝修太殘等，會引起業主反感，更加唔願意減價畀你！」

1％地產投資課程總監鍾學良表示，壓價前要多做準備工夫，需了解屋苑及附近大廈的成交價，或先上網估價，作為壓價理由。「例如估價得310萬，業主開價330萬，根本借唔到咁多錢，點買呀！」

他又提醒勿讓業主知悉買樓作投資用途，「對方覺得你賺不如我賺，更加不會減價啦」。同時切忌踩低單位及直說嫌貴，「最多說樓價貴，自己無本事，要辛苦慢慢儲錢，亦不要說父母畀首期」。而向代理了解業主背景時，遇上手持多個物業及準備移民的業主，大幅「鋤價」的機會較易。