效忠環球下個20年？ Kelly：唔敢諗咁長遠

剛完成20周年演唱會的陳慧琳（Kelly），環球唱片公司為她搞了一個名為「And Then Gallery」活動，Kelly更成為全港唯一女歌手連續20年效力同一間公司，當她接過唱片公司高層黃劍濤（Duncan）頒贈的20周年紀念品時，即時做出無眼睇表情，相當搞笑！

展覽會在銅鑼灣HMV內舉行，穿上迷你連身裙亮相的Kelly十分有型，更有數十名Fans到場支持，每當Kelly講出一張唱片的推出年份，Fans都瞭如指掌，而Kelly最喜歡1999年推出的《花花宇宙》大碟。她望住場內一堵以她出道20年來推出過的唱片封套砌成的牆時，感嘆稱：「最懷緬當年浩浩蕩蕩去希臘拍攝唱片封套，畢竟當時市道好，相信依家比較難咯。」她形容那段時期正值唱片業的光輝黃金歲月。及後場內播放郭富城和張學友預先拍攝的片段，兩人都力讚Kelly勤力又靚女，逗得潮媽笑逐顏開。

事後Kelly接受訪問，談到Duncan頒發紀念品給她，期待有下一個20年，她登時雙眼翻白，問想不想下個20年仍在環球？她笑言：「咁快又嚟？太長遠喇，（好驚？）唔係驚，係唔敢諗咁遠，依家個樣仲呃到人，遲啲唔知Fans接受能力有幾高，我點都係偶像派。」Kelly多年來的唱片銷量也不俗，她笑言今次也沒壓力，新碟《And Then》有十首歌，她坦言做一張唱片不容易，這可能是最後一張十首歌的大碟了。

老公feel到重要性

演唱會後，Kelly沒有出外度假，留在家陪兩個仔，她笑言：「老公最開心，攬住我話：『你終於返嚟啦！』嗰十日佢全心全意湊仔，可能feel到我嘅重要性。」問農曆年會否外遊？她說不考慮，更師奶仔的說：「機票好貴呀！又book唔到酒店，遲啲先啦！」

採訪：Pauline

攝影：林良明

編輯：黃寶恩

設計：梁政敏