香港旅行社向來有口碑，繼永安及康泰後，星晨旅遊喺剛過去嘅聖誕，亦以2.2億被內地資金花樣年集團收購。噚日黛安喺九龍灣星晨總行見到星晨副總裁Philip（周肇基）及市場部總監Wilson（楊振邦）等管理層，佢哋隨即送上新卡片。

花樣年集團喺內地專營房地產，Philip話花樣年旗下管理約1,000萬名業主。嘩？咪仲多過香港總人口（700萬）？即係話只做花樣年業主生意，隨時已經賺到笑。要應付咁龐大市場，Philip話人手亦要相應增加，預計今年會喺內地增聘大約1000人，負責銷售、帶團、後勤及Call centre嘅工作，由星晨香港嘅團隊培訓。

報團優惠 兩大送一細

為咗迎接公司步入新里程，二人透露稍後會推出一項超筍優惠益街坊：今個月內報名指定東南亞團，可享「兩大送一細」優惠（兩個大人報名，可免費帶一個不佔床位嘅小朋友同行）。詳情係點？佢哋話下星期自有分曉。

除咗公司動向，Wilson仲醒咗好多旅遊情報畀黛安。好多人去北歐，只為一睹極光之美，唔講唔知，中國都有極光睇㗎。黑龍江漠河有條北極村，係天文發燒友嘅朝聖地，嗰度影出嚟嘅極光相可媲美北歐。話口未完，佢哋仲Share咗幾張相畀黛安，又真係幾靚喎！