黛安
黛安

樂視破港銷售紀錄 日賣1.2萬部手機

發佈時間: 2016/01/15

樂視破港銷售紀錄 日賣1.2萬部手機

相信唔少IT迷都知道,前日樂視喺網店首次向港人開賣超級手機。噚日黛安去樂視春茗,聽樂視副總裁兼亞太區執行總裁莫翠天提起呢件事時笑逐顏開。點解?原來今次開售,破咗香港史上單日手機銷售紀錄,賣咗超過12,400幾部機,唔怪得啦!

易名「LeEco」

噚日春茗,一班樂視管理層及同事甫見人來,就爭住派新卡片,原因係樂視最近換咗新Logo,由Letv變成「LeEco」。莫總同黛安講,改名係因應旗下產品愈趨多元化,除咗電視,仲有手機、汽車、影音、互聯網金融等業務。他話:「無理由喺樂視架車度印Letv,啲人會覺得好怪。」又啱喎。今次改名做LeEco,象徵樂視整個生態系統,大家要習慣改口啦。

飯前莫總特別喺台上介紹樂視體育CEO程益中畀大家認識,話嚟緊有好多體育重頭節目由佢主理。話口未完,程總就同記者分享樂視攞咗2018世界杯獨家播放權,認真驚喜!

莫總話今年大計包括進軍美國同印度,目標係年內賣1,500萬部超級手機同600萬部電視,滿腦子鴻圖大計。他又多謝傳媒及友好一直支持,所以每人入場都可捧走一個樂視盒子,睇完畀番啲意見佢喎。

撰文: 黛安 消息特靈八卦公關
欄名: 八卦名利場