任達華拍《拜託冰箱》 請攝製隊食雞蛋仔

韓國綜藝節目人氣高企，其中人氣歡樂料理節目《拜託冰箱》最近開拍海外版《Cook家代表》。旅發局把握機會，邀請製作單位嚟香港拍攝，做海外版首站，第一集嘉賓分量十足，係影帝任達華（華哥）！華哥會同Super Junior M成員Henry Lau、多位星級主持同大廚，一齊向韓國觀眾推廣香港。

平日節目中廚師要用嘉賓屋企雪櫃材料製作美食，限時15分鐘。喺《Cook家代表》入面，四位名廚挑戰嘅雪櫃絕不普通，係「米芝蓮」級數！黛安聽講「廚魔」Alvin Leung團隊同一星大廚Tony Lam團隊都有份「出戰」，好刺激！

華哥仲變身「旅遊大使」，送上親手炮製的泡菜做見面禮，個個都讚好味。四位星級大廚李連福、崔鉉奭、李元日、Sam Kim，仲乘機向華哥拎貼士問香港人口味，華哥就預備多款米芝蓮街頭小食包括雞蛋仔，等佢哋親自品嘗。