又喺機場「打卡」，不過黛安唔係去玩，係飛香港！話說噚日國泰航空舉辦年度「空中之旅」，250位來自基層家庭小朋友帶埋屋企人，坐住波音777-300客機，衝上25,000呎高空。除咗國泰CEO朱國樑（Ivan）及企業事務董事唐偉邦（James）之外，特首梁振英都一齊喺香港上空暢遊咗90分鐘。

旅程亮點之一，是機場櫃位嘅「小小地勤」林奕婷（婷婷），年僅8歲嘅小妹妹，喺地勤人員指導下幫乘客辦理登機證，過程睇嚟有啲緊張，佢同黛安講：「原來唔係想像咁簡單！」佢又話將來想嘗試投身航空業，「（因為）可坐飛機，又可以照顧人。」

首讓孩子協助乘務

Ivan話活動舉辦多年，今次係第一次畀小朋友參與唔同機組人員嘅崗位，譬如話幫乘客掃描登機證、派雪糕等，希望可以配合「送上感謝」呢個主題，令參加者體會珍惜眼前所有嘅嘢。

飛機「衝上雲霄」後，機艙笑聲滿載。黛安見婷婷好興奮咁拉住爸媽一齊欣賞空中雲朵。佢父母係聽障人士，黛安同佢哋傾偈時，婷婷好耐心咁充當繙譯員：「爹吔媽咪話好開心可以一家人一齊飛。」佢又同黛安講查實起飛時有少少驚，個心「卟卟跳」。雖則如此，今次對佢都係個難忘體驗。