林煥光想退下來 但又自指「唔Hea得」

黛安平時最愛睇人物專訪，噚日睇完行會召集人林煥光嘅訪問，想同大家分享下。

原來林煥光自幼與馬結緣，細個最難忘去跑馬地中央公園睇動物；長大後覺得跑馬唔單止係一場智力遊戲，從哲學角度睇亦同人生好相似。一場馬嘅勝負包括好多因素，譬如騎師狀態、練馬師嘅戰術等，馬迷只掌握部分因素，最終跑出與否，與天氣等無法預計嘅影響亦有關；就如人生，無論出身幾好、讀書幾叻，父母都唔可以篤定你嘅將來。

正因為人生好多嘢預計唔到，林煥光認為人最緊要識裝備自己。佢仲引用蘋果教主喬布斯嘅講法話，創意諗頭唔係從天而降，而係平時儲喺腦入面，愈多意念，就愈有機會聯繫成創意，所謂天才，其實都係靠平日努力。

佢又話做咗公職40年係時候退落嚟，但自知「唔Hea得」，好彩自己興趣多，鍾意睇戲同睇書，退下來都唔會悶。